आषाढी वारीपूर्वी प्रशासन अलर्ट! वारकऱ्यांच्या सेवेसाठी सर्व सुविधा वेळेत पूर्ण करा; निष्काळजी ठेकेदारांवर कारवाईचे पालकमंत्री जयकुमार गोरे यांचे आदेश

आषाढी वारीपूर्वी प्रशासन अलर्ट! वारकऱ्यांच्या सेवेसाठी सर्व सुविधा वेळेत पूर्ण करा; निष्काळजी ठेकेदारांवर कारवाईचे पालकमंत्री जयकुमार गोरे यांचे आदेश

📍 पंढरपूर | दि. २८ जून २०२६

आषाढी शुद्ध एकादशी सोहळ्यानिमित्त श्री विठ्ठल-रुक्मिणीच्या दर्शनासाठी राज्यभरातून लाखो वारकरी भाविक पंढरपुरात दाखल होणार असल्याच्या पार्श्वभूमीवर सोलापूर जिल्ह्याचे पालकमंत्री जयकुमार गोरे यांनी आज वाखरी पालखीतळ, भक्तीसागर (६५ एकर) आणि चंद्रभागा नदीपात्र परिसराची प्रत्यक्ष पाहणी करून प्रशासनाच्या तयारीचा आढावा घेतला. यावेळी वारकऱ्यांना कोणतीही गैरसोय होणार नाही, यासाठी सर्व कामे तातडीने आणि दर्जेदार पद्धतीने पूर्ण करण्याचे कडक निर्देश त्यांनी संबंधित यंत्रणांना दिले.

वारकरी भाविकांच्या सुरक्षितता, स्वच्छता आणि मूलभूत सुविधांना सर्वोच्च प्राधान्य देण्याच्या सूचना देत वाखरी पालखी तळावरील शौचालय परिसराचे काँक्रिटीकरण, खड्डे बुजविणे, मुरमीकरण, सपाटीकरण, प्रकाश व्यवस्था आणि पाणी साचणार नाही यासाठी कायमस्वरूपी उपाययोजना करण्याचे आदेश त्यांनी दिले.

कॉलेज चौकातील अपूर्ण पुलाचे काम तातडीने पूर्ण करण्याचे निर्देश देतानाच कामात दिरंगाई करणाऱ्या संबंधित ठेकेदारावर कठोर कारवाई करण्यास सांगितले. शहरातील रस्ते व दुभाजकांची स्वच्छता, आवश्यक ठिकाणी रंगकाम, तसेच भक्तीसागर (६५ एकर) परिसरात पिण्याचे पाणी, वीजपुरवठा, स्वच्छता आणि वैद्यकीय सुविधा प्रभावीपणे उपलब्ध ठेवण्याच्या सूचनाही त्यांनी दिल्या.

चंद्रभागा नदीपात्र परिसरातील काटेरी झाडे-झुडपे, मातीचे ढिगारे हटवून परिसर सपाट करण्याचे आदेश देत पालखी सोहळे जिल्ह्यात दाखल होण्यापूर्वी सर्व तयारी पूर्ण करण्याचे निर्देश पालकमंत्र्यांनी प्रशासनाला दिले.

या पाहणीवेळी जिल्हाधिकारी एस. कार्तिकेयन, जिल्हा परिषद मुख्य कार्यकारी अधिकारी कुशल जैन, जिल्हा पोलीस अधीक्षक अतुल कुलकर्णी, श्री विठ्ठल-रुक्मिणी मंदिर समितीचे कार्यकारी अधिकारी राजेंद्र शेळके, समिती सदस्य ज्ञानेश्वर महाराज जळगावकर, व्यवस्थापक प्रवीणकुमार घम, भाजप किसान मोर्चा प्रदेश सचिव माऊलीभाऊ हळणवर, भाजप पंढरपूर मंडलाध्यक्ष हर्षल कदम, जिल्हा परिषद सदस्य आदिनाथ देशमुख, राष्ट्रवादी काँग्रेस (अजित पवार गट) नेते श्रीकांत आबा शिंदे यांच्यासह विविध विभागांचे वरिष्ठ अधिकारी उपस्थित होते.

✍️ संपादकीय संदेश

आषाढी वारी हा महाराष्ट्राच्या संतपरंपरेचा, समतेचा आणि भक्तीचा जागतिक स्तरावर गौरवला जाणारा सांस्कृतिक वारसा आहे. लाखो वारकऱ्यांची सुरक्षितता, स्वच्छता आणि सोयीसुविधा सुनिश्चित करणे ही केवळ प्रशासनाचीच नव्हे तर प्रत्येक नागरिकाची सामूहिक जबाबदारी आहे. प्रशासनाने दिलेल्या निर्देशांची प्रभावी अंमलबजावणी झाली, तर यंदाची आषाढी वारी अधिक सुरक्षित, सुव्यवस्थित आणि भक्तिमय वातावरणात पार पडेल.

— संपादक : सत्यशोधक शंकरराव लिंगे

#हॅशटॅग

#दिनबंधून्यूज #शिवक्रांतीटीव्ही #आषाढीवारी२०२६ #पंढरपूर #विठ्ठलरुक्मिणी #वारकरी #जयकुमारगोरे #स्वच्छवारी #महाराष्ट्र #Pandharpur #AshadhiEkadashi

📲 ७३८७३७७८०१ हा नंबर आपल्या WhatsApp ग्रुपमध्ये जोडा.

👍 बातमी लाईक करा • 🔄 शेअर करा • 📤 फॉरवर्ड करा • 💬 कमेंट करा • 🔔 बेल आयकॉन दाबा • ▶️ सबस्क्राईब करा • 📢 दिनबंधू न्यूज WhatsApp चॅनलला फॉलो करा.