युद्धाचा महाराष्ट्रावर मोठा परिणाम! गॅस टंचाईमुळे उद्योग धंदे संकटात, महागाईतही वाढ
मध्यपूर्वेतील युद्धाचा परिणाम आता महाराष्ट्राच्या उद्योग, व्यापार आणि दैनंदिन जीवनावर दिसू लागला आहे. गॅसचा तुटवडा, कच्च्या मालाच्या वाढलेल्या किंमती आणि निर्यात ठप्प झाल्याने अनेक उद्योग अडचणीत आले आहेत. परिस्थिती अशीच राहिली तर काही उद्योग बंद पडण्याची भीती व्यक्त केली जात आहे.
युद्धाचा परिणाम महाराष्ट्रातही जाणवू लागला
इराण, इस्रायल आणि अमेरिकेमधील वाढत्या संघर्षामुळे जगभरातील ऊर्जा आणि व्यापार व्यवस्थेवर परिणाम झाला आहे. या परिस्थितीचे पडसाद महाराष्ट्रातही उमटू लागले आहेत.
गॅसचा पुरवठा कमी होणे, आयात-निर्यात अडथळ्यात येणे आणि कच्च्या मालाच्या वाढलेल्या किंमती यामुळे राज्यातील अनेक उद्योगांवर दबाव वाढला आहे. उद्योजकांमध्ये अनिश्चिततेचे वातावरण निर्माण झाले असून उत्पादन खर्च मोठ्या प्रमाणात वाढला आहे.
शिर्डीतील साई प्रसादालयाची विशेष तयारी
देशभरात गॅस टंचाईची चर्चा सुरू असताना शिर्डीतील साईबाबा संस्थानने मात्र आधीच तयारी केली आहे.
साई प्रसादालयात दररोज हजारो भाविकांसाठी अन्न तयार केले जाते. त्यामुळे येथे मोठ्या प्रमाणावर गॅसचा वापर होतो. सध्या संस्थानकडे सुमारे २० टन गॅसचा साठा असल्यामुळे पुढील काही दिवस तरी प्रसादालयातील स्वयंपाकात अडचण येणार नाही, असे प्रशासनाने सांगितले आहे.
तसेच संस्थानच्या सौर ऊर्जा प्रकल्पामुळे भात आणि डाळ शिजवण्यासाठी पर्यायी व्यवस्था तयार करण्यात आली आहे. त्यामुळे गॅसवरील अवलंबित्व काही प्रमाणात कमी झाले आहे. मात्र युद्ध लांबले तर भविष्यात अडचणी निर्माण होण्याची शक्यता नाकारता येत नाही.
जळगावातील प्लास्टिक उद्योग संकटात
युद्धामुळे कच्च्या मालाच्या किंमतीत मोठी वाढ झाली आहे. याचा सर्वाधिक परिणाम जळगावातील प्लास्टिक उद्योगावर झाला आहे.
एमआयडीसी परिसरातील सुमारे ४०० प्लास्टिक उद्योगांवर या परिस्थितीचा परिणाम झाला आहे. कच्च्या मालाच्या किंमती तब्बल ५० टक्क्यांनी वाढल्यामुळे अनेक उद्योजकांना उत्पादन सुरू ठेवणे कठीण झाले आहे.
काही उद्योगांनी उत्पादन कमी केले आहे, तर काहींना कारखाने तात्पुरते बंद ठेवण्याची वेळ आली आहे.
पिंपरी-चिंचवडमध्ये कमर्शियल गॅसचा तुटवडा
औद्योगिक शहर म्हणून ओळखल्या जाणाऱ्या पिंपरी-चिंचवडमध्ये व्यावसायिक गॅसचा तुटवडा जाणवू लागला आहे.
पूर्वी अनेक कंपन्यांमध्ये दोन शिफ्टमध्ये काम चालत होते. मात्र गॅसचा पुरवठा कमी झाल्याने आता अनेक कारखान्यांमध्ये फक्त एकाच शिफ्टमध्ये उत्पादन सुरू ठेवण्यात येत आहे.
उद्योजकांच्या मते, जर गॅस पुरवठा सुरळीत झाला नाही तर काही कंपन्यांचे कामकाज पूर्णपणे बंद होण्याची शक्यता आहे.
औद्योगिक वसाहतींमध्ये उत्पादनावर परिणाम
अहिल्यानगरसह अनेक औद्योगिक भागांमध्ये गॅसच्या कमतरतेमुळे उद्योगांना अडचणींचा सामना करावा लागत आहे.
गॅसवर आधारित सुमारे १५ उद्योग सध्या संकटात आहेत. उत्पादन प्रक्रियेसाठी आवश्यक इंधन उपलब्ध नसल्याने उत्पादन कमी करावे लागत आहे.
उद्योगपतींनी प्रशासनाकडे गॅस पुरवठा सुरळीत करण्याची मागणी केली असून परिस्थिती सुधारली नाही तर उद्योग बंद होण्याची भीती व्यक्त केली जात आहे.
ड्रायफ्रूट आणि फळांच्या बाजारात महागाई
युद्धाचा परिणाम केवळ उद्योगांवरच नाही तर बाजारपेठेवरही झाला आहे.
रायगड जिल्ह्यातील माणगाव येथे ड्रायफ्रूट बाजारात मोठी महागाई दिसून येत आहे. रमजान महिन्याच्या पार्श्वभूमीवर खजूर, मनुके, अंजीर आणि पिस्ता यांसारख्या वस्तूंच्या किंमती १५ ते २० टक्क्यांनी वाढल्या आहेत.
याशिवाय सफरचंद, द्राक्षे आणि किवी यांसारख्या फळांच्या किंमतींमध्ये २५ टक्क्यांपर्यंत वाढ झाली आहे.
संभाजीनगरमध्ये उद्योगांवर संकट
छत्रपती संभाजीनगरमध्ये एलपीजी गॅसच्या तुटवड्यामुळे अनेक उद्योग अडचणीत आले आहेत.
काही कंपन्यांकडे फक्त काही तासांचा गॅस साठा उरला आहे. गॅस मिळाला नाही तर उत्पादन थांबण्याची शक्यता आहे. एका कंपनीमध्येच सुमारे १२०० कामगारांचे रोजगार धोक्यात येऊ शकतात.
