भारत जगाला जोडणारी शक्ती; आता भारताच्या नेतृत्वाची वेळ आली, मोहन भागवत यांचे स्वयंसेवकांना मार्गदर्शन
राष्ट्रीय स्वयंसेवक संघाच्या ‘कार्यकर्ता विकास वर्ग-२’च्या समारोप कार्यक्रमात सरसंघचालक मोहन भागवत यांनी स्वयंसेवकांना संबोधित करत भारताच्या जागतिक भूमिकेवर महत्त्वपूर्ण भाष्य केले. नागपूरच्या रेशीमबाग मैदानावर झालेल्या या कार्यक्रमात त्यांनी सध्याच्या जागतिक परिस्थितीचा उल्लेख करत भारत जगाला दिशा देऊ शकतो, असा विश्वास व्यक्त केला.
भागवत म्हणाले की, जगभरात विविध देशांमध्ये संघर्ष आणि युद्धजन्य परिस्थिती निर्माण होत आहे. एखाद्या प्रदेशातील युद्धाचा परिणाम थेट इतर देशांवरही होत असून तेलाच्या किमतींसारख्या आर्थिक घडामोडींचा फटका सर्वसामान्यांना बसत आहे. अशा परिस्थितीत जगाला एकत्र आणणारी शक्ती म्हणून भारताकडे पाहिले जात असल्याचे त्यांनी सांगितले.
आपल्या भाषणात त्यांनी भारताच्या ऐतिहासिक आणि सांस्कृतिक परंपरेचा उल्लेख केला. भारत पूर्वी विश्वगुरू होता आणि हजारो वर्षांच्या संघर्षानंतरही देशाची सांस्कृतिक ओळख टिकून राहिली, असे ते म्हणाले. स्वामी विवेकानंद आणि महर्षी दयानंद सरस्वती यांच्यापासून सुरू झालेल्या वैचारिक जागरणाचा संदर्भ देत त्यांनी भारतीय मूल्यांची आजही जगभरात चर्चा होत असल्याचे नमूद केले.
“भारताची वेळ आली आहे, पण केवळ वेळ आली म्हणून चालणार नाही. त्या भूमिकेसाठी स्वतःला तयार करावे लागेल,” असे सांगत त्यांनी समाज आणि स्वयंसेवकांनी अधिक सक्रिय होण्याचे आवाहन केले. भारताला पुन्हा जागतिक नेतृत्वाची भूमिका निभवायची असेल तर त्यासाठी सामूहिक प्रयत्नांची गरज असल्याचे त्यांनी स्पष्ट केले.
भागवत यांनी जगाचे अंधानुकरण करण्याऐवजी भारताने स्वतःचा विकासाचा मार्ग तयार करावा, असे मत व्यक्त केले. जगाला नवा विचार आणि नवी दिशा देण्याची क्षमता भारतात आहे. मात्र त्यासाठी परिश्रम, संघटन आणि राष्ट्रीय बांधिलकी आवश्यक असल्याचे त्यांनी सांगितले.
यावेळी त्यांनी ‘वसुधैव कुटुंबकम’ या भारतीय विचारसरणीचाही उल्लेख केला. जगाच्या कल्याणाचा विचार करणे ही भारताची परंपरा असल्याचे सांगत त्यांनी स्वयंसेवकांना समाजकार्य आणि राष्ट्रकार्यात अधिक सक्रिय सहभाग नोंदवण्याचे आवाहन केले.
संघाच्या कार्याचा उल्लेख करताना त्यांनी सांगितले की, संघाचे नाव समाजाने घेतले नाही तरी हरकत नाही, मात्र राष्ट्रहित आणि समाजहित सर्वोच्च राहिले पाहिजे. केवळ प्रेक्षक बनून न राहता प्रत्यक्ष कृतीत सहभागी होण्याची वेळ आली असल्याचे त्यांनी नमूद केले.
या भाषणातून मोहन भागवत यांनी भारताच्या जागतिक भूमिकेबाबत आशावादी दृष्टिकोन मांडताना स्वयंसेवकांना राष्ट्रनिर्मितीत सक्रिय योगदान देण्याचा संदेश दिला. सध्याच्या जागतिक अस्थिरतेच्या पार्श्वभूमीवर भारताने नेतृत्वाची भूमिका स्वीकारण्याची तयारी ठेवली पाहिजे, असे त्यांनी ठामपणे सांगितले.
