बीड पुन्हा हादरलं! जयराम चाटेच्या टोळीचा तरुणावर जीवघेणा हल्ला
बीड जिल्ह्यात गुन्हेगारीची आणखी एक धक्कादायक घटना समोर आली आहे. केज तालुक्यातील तांबवा परिसरात एका तरुणावर मिरची पावडर टाकून आणि लोखंडी रॉड-कत्तीने हल्ला करण्यात आला असून तो गंभीर जखमी झाला आहे.
केज तालुक्यात दहशतीचे वातावरण
बीड जिल्ह्यात गेल्या काही महिन्यांपासून गुन्हेगारीच्या घटनांमुळे वातावरण तणावपूर्ण झाले आहे. अशातच केज तालुक्यातील तांबवा परिसरात एका तरुणावर जीवघेणा हल्ला झाल्याची घटना समोर आली.
या घटनेमुळे परिसरात पुन्हा एकदा भीतीचे वातावरण निर्माण झाले असून पोलिसांनी तपास सुरू केला आहे.
पाच जणांचा हल्ला
मिळालेल्या माहितीनुसार संग्राम चाटे नावाच्या तरुणाला काही जणांनी अडवून त्याच्या डोळ्यात मिरची पावडर टाकली. त्यानंतर हल्लेखोरांनी कत्ती आणि लोखंडी रॉडने मारहाण केली.
हल्ला इतका गंभीर होता की तरुण गंभीर जखमी झाला. सध्या त्याच्यावर केज येथील उपजिल्हा रुग्णालयात उपचार सुरू असल्याची माहिती मिळाली आहे.
हल्ल्यावेळी घेतली जयराम चाटेचे नाव
हल्ला करताना आरोपींनी जयराम चाटे आणि कृष्णा आंधळे यांचे नाव घेत धमकी दिल्याचा आरोप करण्यात आला आहे.
हल्लेखोरांनी “आमचा किंग पॅटर्न कृष्णा आंधळे” असा उल्लेख करत धमकावल्याचेही सांगितले जात आहे. या घटनेमुळे गावात दहशतीचे वातावरण निर्माण झाले.
जयराम चाटे काही तासांसाठी तुरुंगाबाहेर
या घटनेदरम्यान संतोष देशमुख खून प्रकरणातील आरोपी जयराम चाटे हा भावाच्या बाराव्या विधीसाठी काही तासांसाठी तुरुंगाबाहेर आला होता.
तो सकाळी सुमारे 9 ते संध्याकाळी 4 या वेळेत पोलिस बंदोबस्तात बाहेर होता आणि विधी पूर्ण झाल्यानंतर पुन्हा त्याला तुरुंगात नेण्यात आले.
पाच आरोपींवर गुन्हा दाखल
या हल्ल्याप्रकरणी केज पोलिस ठाण्यात पाच जणांविरुद्ध हत्येचा प्रयत्न केल्याचा गुन्हा दाखल करण्यात आला आहे.
पोलिसांनी हल्ल्याचा तपास सुरू केला असून आरोपींचा शोध घेतला जात आहे. या घटनेनंतर परिसरात पोलीस बंदोबस्त वाढवण्यात आला आहे.
