महाराष्ट्रात LPG टंचाई वाढली; जालना-परभणीपासून नाशिक-नागपूरपर्यंत नागरिक त्रस्त
मध्यपूर्वेतील युद्धाचा परिणाम आता महाराष्ट्रातही दिसू लागला आहे. राज्यातील अनेक शहरांमध्ये LPG गॅस सिलेंडरचा तुटवडा निर्माण झाला असून नागरिकांना सिलेंडरसाठी लांब रांगा लावाव्या लागत आहेत.
युद्धाचा परिणाम महाराष्ट्रातही
मध्यपूर्वेत सुरू असलेल्या अमेरिका-इस्रायल-इराण संघर्षाचे परिणाम आता भारतात आणि विशेषतः महाराष्ट्रात जाणवू लागले आहेत. गॅस पुरवठा साखळीवर परिणाम झाल्यामुळे अनेक जिल्ह्यांमध्ये LPG सिलेंडर मिळण्यात अडचणी येत आहेत.
अनेक ठिकाणी ऑनलाइन गॅस बुकिंग सेवा बंद पडली असून नागरिकांना थेट गॅस एजन्सीकडे जावे लागत आहे. त्यामुळे एजन्सी कार्यालयांबाहेर मोठ्या रांगा लागल्याचे चित्र दिसत आहे.
नाशिकमध्ये बुकिंग सेवा बंद
नाशिक जिल्ह्यातील लासलगाव परिसरात HP गॅसचे ऑनलाइन बुकिंग काही काळासाठी बंद करण्यात आले आहे.
यामुळे नागरिकांनी थेट एजन्सीवर जाऊन सिलेंडर घेण्याचा प्रयत्न सुरू केला आहे. एजन्सी कार्यालयाबाहेर मोठी गर्दी होत असल्याने परिस्थिती तणावपूर्ण झाली आहे. ग्राहकांनी आधीच बुकिंग केलेल्या सिलेंडरचा पुरवठा कधी होणार याबाबतही अनिश्चितता असल्याचे सांगितले जात आहे.
परभणीत घरगुती गॅसचा व्यावसायिक वापर
परभणी जिल्ह्यात व्यावसायिक गॅस सिलेंडर उपलब्ध नसल्यामुळे काही ठिकाणी घरगुती LPG सिलेंडरचा व्यावसायिक वापर वाढल्याचे प्रशासनाच्या निदर्शनास आले आहे.
यावर कारवाई करत जिल्हा पुरवठा विभागाने काही हॉटेल्सवर छापे टाकून सिलेंडर जप्त केले आहेत.
वर्ध्यात प्रशासनाची कारवाई
वर्धा जिल्ह्यातील देवळी तालुक्यातही अवैध वापराविरोधात कारवाई करण्यात आली.
प्रशासनाने काही हॉटेल आणि टपऱ्यांवर छापे टाकून 11 घरगुती सिलेंडर जप्त केले. काळाबाजार रोखण्यासाठी प्रशासन अलर्ट मोडवर असल्याचे अधिकाऱ्यांनी सांगितले.
जालन्यात सिलेंडरसाठी लांब रांगा
जालना शहरात गॅस एजन्सीबाहेर नागरिकांच्या लांबच लांब रांगा लागल्या आहेत.
शहर आणि ग्रामीण भागातून लोक सकाळपासूनच सिलेंडर घेण्यासाठी एजन्सीकडे येत आहेत. कडाक्याच्या उन्हात तासन्तास उभे राहूनही सिलेंडर मिळेल की नाही याबाबत लोकांमध्ये संभ्रम असल्याचे दिसत आहे.
सांगली आणि लातूरमध्येही परिणाम
सांगली जिल्ह्यात व्यावसायिक गॅस सिलेंडर मिळत नसल्यामुळे काही हॉटेल्स बंद ठेवावी लागली आहेत.
तर लातूरमध्ये एका शासकीय वसतिगृहात गॅस नसल्याने दोन दिवसांपासून मर्यादित जेवणाचा मेन्यू ठेवण्यात आला आहे. काही ठिकाणी स्वयंपाकासाठी पुन्हा चुलीचा वापर सुरू केल्याची माहितीही समोर आली आहे.
उद्योगांवरही संकट
गॅस टंचाई कायम राहिल्यास राज्यातील अनेक उद्योग बंद पडण्याची भीती व्यक्त केली जात आहे. उद्योग संघटनांच्या मते LPG पुरवठा थांबल्यास 10 हजारांहून अधिक उद्योगांवर परिणाम होऊ शकतो आणि लाखो लोकांच्या रोजगारावर त्याचा परिणाम होण्याची शक्यता आहे.
