मिरा-भाईंदरमध्ये धक्कादायक प्रकार! व्हेंटिलेटरवरील रुग्णेला उंदराचा चावा; महिलेचा मृत्यू
मिरा-भाईंदर येथील सरकारी रुग्णालयात अत्यंत धक्कादायक घटना घडली आहे. आयसीयूमध्ये व्हेंटिलेटरवर उपचार सुरू असलेल्या 89 वर्षीय महिलेच्या हाताला उंदराने चावा घेतल्याचा आरोप करण्यात आला असून काही तासांतच तिचा मृत्यू झाला.
आयसीयूमध्ये घडलेला धक्कादायक प्रकार
मिरा-भाईंदर पश्चिम येथील पंडित भीमसेन जोशी सरकारी रुग्णालयात अत्यंत गंभीर स्वरूपाची घटना समोर आली आहे. आयसीयूमध्ये व्हेंटिलेटरवर उपचार घेत असलेल्या एका वृद्ध महिलेला उंदराने चावा घेतल्याचा आरोप करण्यात आला आहे. या घटनेनंतर काही तासांतच त्या महिलेचा मृत्यू झाल्याने रुग्णालयाच्या व्यवस्थापनावर गंभीर प्रश्न उपस्थित झाले आहेत.
89 वर्षीय रुग्ण आयसीयूमध्ये दाखल
मृत महिला सुहासिनी माटेकर (वय 89) यांना श्वसनाशी संबंधित आजारामुळे 12 मार्च रोजी रुग्णालयात दाखल करण्यात आले होते. प्रकृती गंभीर झाल्यानंतर त्यांना आयसीयूमध्ये व्हेंटिलेटरवर ठेवण्यात आले होते.
कुटुंबीयांच्या मते, त्यांच्यावर उपचार सुरू असतानाच ही धक्कादायक घटना घडली.
नातेवाईकांनी पाहिला जखमेचा प्रकार
सोमवारी सकाळी नातेवाईक भेटायला आले असता त्यांनी रुग्णाच्या हातावर जखमा आणि रक्त दिसल्याचे सांगितले. त्या जखमा उंदराने कुरतडल्यासारख्या असल्याचा संशय त्यांनी व्यक्त केला.
कुटुंबीयांनी दावा केला की सुरुवातीला रुग्णालयातील कर्मचारी या घटनेबाबत अनभिज्ञ होते. त्यांनी लक्ष वेधल्यानंतरच वैद्यकीय कर्मचाऱ्यांनी तपास सुरू केला.
रुग्णालय प्रशासनावर प्रश्न
ही घटना समोर आल्यानंतर रुग्णालयातील स्वच्छता आणि सुरक्षेबाबत गंभीर प्रश्न उपस्थित झाले आहेत. आयसीयू सारख्या अत्यंत संवेदनशील विभागात उंदरांची समस्या कशी निर्माण झाली, असा सवाल स्थानिकांनी उपस्थित केला आहे.
कुटुंबीयांच्या म्हणण्यानुसार रुग्णालयात आधीही उंदरांची समस्या दिसून आली होती.
चौकशीचे आदेश
या घटनेनंतर प्रशासनाने तात्काळ कारवाई करत ड्युटीवरील वैद्यकीय अधिकारी आणि परिचारिकेची बदली केली आहे. तसेच संबंधित कर्मचाऱ्यांना कारणे दाखवा नोटीस देण्यात आली असून संपूर्ण प्रकरणाची विभागीय चौकशी सुरू करण्यात आली आहे.
रुग्णालय प्रशासनाने परिसरात सुरू असलेल्या बांधकामामुळे उंदरांची संख्या वाढल्याचा प्राथमिक अंदाज व्यक्त केला आहे.
संतापाची लाट
या घटनेमुळे स्थानिक नागरिकांमध्ये संताप व्यक्त होत आहे. रुग्णालयातील स्वच्छता आणि रुग्ण सुरक्षेच्या व्यवस्थेवर कठोर कारवाई करण्याची मागणी करण्यात येत आहे.
दरम्यान, चौकशी अहवालानंतरच या प्रकरणातील खरी जबाबदारी निश्चित होणार आहे.
