उद्धव ठाकरे उद्या करणार मोठी घोषणा! पत्रकार परिषद बोलावली; सरकारविरोधात राज्यव्यापी आंदोलनाची तयारी

उद्धव ठाकरे यांची उद्या पत्रकार परिषद

राज्यातील वेगवान राजकीय घडामोडींच्या पार्श्वभूमीवर शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी शुक्रवारी दुपारी पत्रकार परिषद बोलावली आहे. या पत्रकार परिषदेत ते महत्त्वाची घोषणा करणार असल्याने राज्याच्या राजकारणात उत्सुकता निर्माण झाली आहे.

राज्यव्यापी आंदोलनाची घोषणा होण्याची शक्यता

मिळालेल्या माहितीनुसार, राम मंदिरातील कथित देणगी घोटाळ्याच्या मुद्द्यावर ठाकरे गट राज्यव्यापी आंदोलन छेडणार आहे. या आंदोलनाची अधिकृत घोषणा उद्धव ठाकरे पत्रकार परिषदेत करतील, अशी माहिती समोर आली आहे.

राम मंदिर आणि हनुमान मंदिरांमध्ये महाआरती

या आंदोलनाचा भाग म्हणून राज्यभरातील राम मंदिर आणि हनुमान मंदिरांमध्ये महाआरतीचे आयोजन करण्यात येणार आहे. पहिली महाआरती दादर पश्चिम येथील हनुमान मंदिरात आयोजित करण्यात येणार असल्याची माहिती आहे.

सरकारला घेरण्याची रणनीती

ठाकरे गट या आंदोलनाच्या माध्यमातून राज्य सरकारला राजकीयदृष्ट्या घेरण्याची तयारी करत आहे. पक्षाचे खासदार संजय राऊत यांनीही सोशल मीडियावर पत्रकार परिषदेची माहिती देत मोठ्या घोषणेचे संकेत दिले आहेत.

पक्षातील घडामोडीनंतर अॅक्शन मोडमध्ये ठाकरे

गेल्या काही दिवसांत ठाकरे गटातील सहा खासदारांनी पक्ष सोडला. त्यानंतर विधान परिषदेचे सदस्य सचिन अहिर यांनीही एकनाथ शिंदे यांच्या शिवसेनेत प्रवेश केला. या घडामोडीनंतर उद्धव ठाकरे राज्यभर दौरे आणि सभा घेत असून आता पत्रकार परिषदेद्वारे पुढील राजकीय भूमिका स्पष्ट करणार आहेत.

पत्रकार परिषदेकडे सर्वांचे लक्ष

शुक्रवारी होणाऱ्या पत्रकार परिषदेत उद्धव ठाकरे नेमकी कोणती घोषणा करतात, आंदोलनाचा आराखडा काय असेल आणि सरकारविरोधातील पुढील रणनीती काय असेल, याकडे राज्यातील राजकीय वर्तुळाचे लक्ष लागले आहे.