दुबईत अडकलेल्या मराठी नागरिकांसाठी एकनाथ शिंदे यांची धावपळ; विशेष विमानांतून १६४ जण मुंबईत परतणार
मध्य-पूर्वेतील संघर्षामुळे हवाई वाहतूक विस्कळीत
इराण–इस्रायल–अमेरिका यांच्यात सुरू असलेल्या तीव्र संघर्षामुळे मध्य-पूर्वेतील हवाई क्षेत्रावर परिणाम झाला आहे. अनेक उड्डाणे रद्द किंवा वळवली गेल्याने दुबईसह संयुक्त अरब अमिरातीतील विविध भागांत महाराष्ट्रातील नागरिक अडकले होते. या पार्श्वभूमीवर राज्याचे उपमुख्यमंत्री एकनाथ शिंदे यांनी तातडीने हस्तक्षेप करत विशेष विमानांची व्यवस्था केली आहे.
फुजैरा विमानतळावरून दोन विशेष उड्डाणे
मिळालेल्या माहितीनुसार, फुजैरा विमानतळावरून स्टार एअरची दोन विशेष विमाने आज मुंबईकडे रवाना होणार आहेत.
-
VTGSO हे विमान दुपारी सुमारे ३.३० वाजता उड्डाण घेणार आहे.
-
VT GSH हे दुसरे विमान सायंकाळी ४.३० वाजता उड्डाण करणार आहे.
या दोन्ही विमानांद्वारे एकूण १६४ प्रवासी मुंबई विमानतळावर सायंकाळी अंदाजे ५.३० ते ७.०० या वेळेत दाखल होतील.
विद्यार्थ्यांसह विविध भागांतील नागरिकांचा समावेश
या प्रवाशांमध्ये पुण्यातील इंदिरा स्कूल ऑफ बिझनेस स्टडीजचे ८४ विद्यार्थी आहेत. तसेच ठाणे, मुरबाड, अहिल्यानगर आणि इतर भागांतील नागरिकांचाही समावेश आहे. हवाई क्षेत्र बंद झाल्याने आणि उड्डाणे स्थगित झाल्याने हे नागरिक दुबईत अडकले होते.
उपमुख्यमंत्र्यांचा थेट संवाद
दोन दिवसांपूर्वी उपमुख्यमंत्री एकनाथ शिंदे यांनी अडकलेल्या नागरिकांशी थेट संवाद साधला होता. “तुम्ही सुरक्षित आहात, चिंता करू नका. महाराष्ट्र शासन आणि मी स्वतः तुमच्या पाठीशी आहोत,” असा दिलासा त्यांनी दिला होता.
त्यानंतर संबंधित दूतावास, विमान कंपन्या आणि प्रशासकीय यंत्रणांशी सातत्याने संपर्क साधून विशेष उड्डाणांची व्यवस्था करण्यात आली.
कोल्हापूरचे २९ पर्यटक मायदेशी परतले
दरम्यान, दुबईला पर्यटनासाठी गेलेला कोल्हापूरमधील २९ जणांचा गटही सुखरूप परतला आहे. या प्रवाशांनी दुबईत अनुभवलेल्या तणावपूर्ण परिस्थितीची माहिती दिली. त्यांच्या निवासस्थानाजवळ स्फोट झाल्याचे तसेच विमानतळाकडे जाताना स्फोटांचे आवाज ऐकू आल्याचे त्यांनी सांगितले.
सुदैवाने कोणतीही इजा न होता मायदेशी परतता आल्याचा दिलासा व्यक्त करत त्यांनी सरकारचे आभार मानले.
संकट काळात समन्वयाची भूमिका
मध्य-पूर्वेतील वाढत्या तणावाच्या पार्श्वभूमीवर महाराष्ट्रातील नागरिकांची सुरक्षित सुटका करण्यासाठी राज्य सरकारकडून समन्वयात्मक पावले उचलली जात असल्याचे दिसून येते. परिस्थिती अद्याप संवेदनशील असल्याने परदेशात असलेल्या नागरिकांनी स्थानिक प्रशासनाच्या सूचनांचे पालन करावे, असे आवाहनही करण्यात आले आहे
