सोलापूरात तीव्र संताप! महात्मा फुले पुतळा विटंबनेविरोधात जिल्हाधिकाऱ्यांना धडक निवेदन
सोलापूरात तीव्र संताप! महात्मा फुले पुतळा विटंबनेविरोधात जिल्हाधिकाऱ्यांना धडक निवेदन
सोलापूर : तेलंगणा राज्यातील संगारेड्डी जिल्ह्यातील तेल्लापूर येथे राष्ट्रपिता महात्मा ज्योतिराव फुले यांच्या पुतळ्यावर झालेल्या भ्याड हल्ल्याच्या निषेधार्थ सोलापूरात संतप्त प्रतिक्रिया उमटली असून सत्यशोधक व ओबीसी बांधवांनी जिल्हाधिकारी कार्यालयावर धडक देत तीव्र शब्दांत निषेध नोंदवला. सत्यशोधक शंकरराव लिंगे व बापूसाहेब भगवान भंडारे यांच्या नेतृत्वाखाली मा. जिल्हाधिकारी, सोलापूर यांना अधिकृत निवेदन सादर करण्यात आले. या निवेदनाच्या प्रती मा. पंतप्रधान, भारत सरकार, मा. केंद्रीय गृहमंत्री, भारत सरकार, मा. मुख्यमंत्री, तेलंगणा राज्य, मा. गृहमंत्री, तेलंगणा राज्य, राष्ट्रीय मागासवर्ग आयोग, राष्ट्रीय अनुसूचित जाती आयोग आणि राष्ट्रीय मानवाधिकार आयोग यांना तातडीने पाठवाव्यात, अशी ठाम मागणी करण्यात आली. निवेदनाची आवक-जावक (Inward) नोंद करून संबंधित दोषींवर कठोर कारवाई करावी, अन्यथा तीव्र आंदोलन छेडण्याचा इशारा देण्यात आला.
या प्रसंगी ओबीसी नेते व सत्यशोधक, राष्ट्रीय अध्यक्ष व संस्थापक महात्मा फुले सामाजिक शिक्षण संस्था, नवी दिल्लीचे शंकरराव लिंगे यांनी स्पष्ट शब्दांत सांगितले की, “महात्मा फुले यांचा अपमान सहन केला जाणार नाही. दोषींना तात्काळ अटक करून कठोर शिक्षा झालीच पाहिजे.” अखिल भारतीय महात्मा फुले समता परिषद सोलापूरचे जिल्हाध्यक्ष बापूसाहेब भगवान भंडारे यांनीही संतप्त भावना व्यक्त करत शासनाने तातडीने भूमिका स्पष्ट करावी, अशी मागणी केली.
निवेदन देताना आप्पासाहेब होनमाने, मनीषा वाघमोडे, कमल गायकवाड, मारुती ढगे, दया उबाळे, प्रतीक्षा चव्हाण, माधुरी ताई पार परिवार, कृष्णदेव वाघमोडे, ज्योती खरात, राजेश साहेब, अंबिका गुरव, हसीना नदाफ यांसह अनेक मान्यवर उपस्थित होते. उपस्थित सर्वांनी एकमुखाने इशारा दिला की, सामाजिक क्रांतीचे जनक महात्मा फुले यांच्या सन्मानाशी कुणीही खेळ करण्याचा प्रयत्न केल्यास संपूर्ण देशभर आंदोलनाची ठिणगी पेटेल.
सोलापूरात दिलेले हे निवेदन केवळ औपचारिकता नसून सामाजिक न्यायाच्या लढ्याची ठाम भूमिका आहे. आता शासनाने त्वरित आणि कठोर कारवाई करावी, अन्यथा रस्त्यावर उतरून तीव्र जनआंदोलन उभारले जाईल, असा सज्जड इशारा देण्यात आला.
#महात्मा_फुले #StatueVandalism #JusticeForPhule #OBCएकता #सत्यशोधक #सोलापूर #तेलंगणा #SocialJustice #PhuleIdeology #कारवाई_झालीच_पाहिजे #दलितओबीसीएकजूट #संविधान_संरक्षण #आंदोलनाचा_इशारा #फुलेअपमान_सहन_नाही
