‘तुम लढो, हम कपडा संभालते है’; सोनम वांगचूक आंदोलनाच्या समर्थनावरून एकनाथ शिंदेंचा उद्धव ठाकरेंवर जोरदार हल्ला

सोनम वांगचूक आंदोलनावरून शिंदेंचा निशाणा

दिल्लीतील जंतरमंतरवर सुरू असलेल्या सोनम वांगचूक यांच्या आंदोलनाला शिवसेना (उद्धव बाळासाहेब ठाकरे) पक्षाने पाठिंबा जाहीर केला आहे. यावर प्रतिक्रिया देताना उपमुख्यमंत्री एकनाथ शिंदे यांनी उद्धव ठाकरे यांच्यावर टीका करत, “आता हे उशिरा सुचलेलं शहाणपण आहे,” असे म्हटले.

‘तुम लढो, हम कपडा संभालते है’

एकनाथ शिंदे म्हणाले, “त्यांचा नेहमीच बाहेरून आणि घरातून पाठिंबा असतो. ‘तुम लढो, हम कपडा संभालते है’ अशी त्यांची सवय आहे.” तसेच, “बुडाला जळतंय आणि डोंगरावर आग विझवायला धावतोय,” अशा शब्दांत त्यांनी उद्धव ठाकरे यांच्या भूमिकेवर टीका केली.

‘राजकीय पोळी भाजण्याचा प्रयत्न’

शिंदे यांनी आरोप केला की, सरकारविरोधात कोणतेही आंदोलन सुरू झाले की ठाकरे गट त्याला पाठिंबा देतो. देशभरातील विद्यार्थी आंदोलन आणि सोनम वांगचूक यांच्या आंदोलनाच्या माध्यमातून राजकीय पोळी भाजण्याचा प्रयत्न केला जात असल्याचा आरोप त्यांनी केला.

‘देशात अराजकता पसरवण्याचा प्रयत्न’

शिंदे म्हणाले की, काही विरोधी पक्ष देशात आणि राज्यात अराजकता निर्माण करण्याचा प्रयत्न करत आहेत. मात्र, पंतप्रधान नरेंद्र मोदी यांच्या नेतृत्वाखाली देशाची अर्थव्यवस्था मजबूत होत असून, कोट्यवधी नागरिकांना विविध कल्याणकारी योजनांचा लाभ मिळत असल्याचा दावा त्यांनी केला.

हिंदुत्वाच्या मुद्द्यावरही टीका

रामरक्षा आंदोलनाचा उल्लेख करत शिंदे म्हणाले, “आधी हनुमान चालीसा म्हणणाऱ्यांना तुरुंगात टाकलं आणि आता रामरक्षा आंदोलन करत आहेत.” तसेच, “बाळासाहेब ठाकरे यांचे विचार सोडले, तेव्हाच त्यांचं हिंदुत्वही सुटलं,” असा आरोप त्यांनी उद्धव ठाकरे यांच्यावर केला.

राजकीय वातावरण तापलं

सोनम वांगचूक यांच्या आंदोलनाला उद्धव ठाकरे यांनी दिलेल्या समर्थनानंतर आणि त्यावर एकनाथ शिंदे यांनी केलेल्या टीकेमुळे महाराष्ट्रातील राजकीय वातावरण पुन्हा तापले आहे. दोन्ही बाजूंनी आरोप-प्रत्यारोप सुरू असून या मुद्द्यावर पुढील काही दिवसांत आणखी राजकीय घडामोडी घडण्याची शक्यता व्यक्त केली जात आहे.