‘त्यांना ताकदवान लोक नकोत, गुलाम हवेत’; बंडखोर संजय दिना पाटील यांचा ठाकरे गटावर घणाघात

पक्षप्रवेशानंतर संजय दिना पाटील यांचा पहिला हल्लाबोल

उद्धव ठाकरे गटातील सहा खासदारांनी रविवारी एकनाथ शिंदे यांच्या उपस्थितीत शिवसेनेत प्रवेश केला. या प्रवेशानंतर ईशान्य मुंबईचे खासदार संजय दिना पाटील यांनी माध्यमांशी संवाद साधत आपल्या नाराजीमागील कारणे उघड केली.

‘माझा प्रॉब्लेम एका व्यक्तीशी होता’

संजय दिना पाटील म्हणाले की, पक्ष सोडण्यामागे उद्धव ठाकरे नव्हते, तर एका विशिष्ट व्यक्तीमुळे त्यांना सतत त्रास सहन करावा लागत होता. “समोर गोड बोलायचं आणि मागून शिव्या द्यायच्या,” असा आरोप त्यांनी केला.

‘हे आधी घडलं असतं तर मी गेलो नसतो’

उद्धव ठाकरे यांनी अलीकडेच मतदारांची माफी मागितल्याचा संदर्भ देत पाटील म्हणाले की, जर नेतृत्वाने आधीच मध्यस्थी करून मतभेद मिटवले असते तर आपण पक्ष सोडला नसता. संबंधित व्यक्ती आणि माझ्यात संवाद घडवून आणला असता तर परिस्थिती वेगळी असती, असे त्यांनी सांगितले.

‘ताकदवान लोक नकोत, गुलाम हवेत’

आपली नाराजी व्यक्त करताना संजय दिना पाटील यांनी सर्वाधिक चर्चेत आलेले विधान केले. “यांना ताकदवान लोक नको आहेत, त्यांना फक्त गुलाम लोकं हवी आहेत,” असा आरोप त्यांनी केला. या वक्तव्यामुळे राजकीय वर्तुळात नव्या चर्चांना सुरुवात झाली आहे.

उद्धव ठाकरे कुटुंबाबद्दल आदर कायम

आपला रोख उद्धव ठाकरे यांच्याकडे आहे का, असा प्रश्न विचारण्यात आल्यानंतर पाटील यांनी स्पष्ट शब्दांत उत्तर दिले. “उद्धव ठाकरे आणि त्यांच्या कुटुंबाविषयी माझी कोणतीही तक्रार नाही. त्यांनी मला नेहमी मान दिला,” असे ते म्हणाले.

संजय राऊतांबाबतही वेगळी भूमिका

संजय राऊत यांच्याबद्दल नाराजी आहे का, असे विचारले असता पाटील यांनी त्यांच्याबद्दलही सकारात्मक भूमिका घेतली. 2004 मध्ये आमदार होण्यासाठी आणि नंतरच्या निवडणुकांमध्ये राऊत यांनी मदत केल्याचे सांगत त्यांच्याशीही वैयक्तिक वाद नसल्याचे त्यांनी स्पष्ट केले.

कुटुंबातील प्रत्येकाला निर्णयाचे स्वातंत्र्य

राजुल पाटील ठाकरे गटात राहणार असल्याच्या चर्चांवर प्रतिक्रिया देताना संजय दिना पाटील म्हणाले की, त्यांच्या घरातील प्रत्येक व्यक्तीला स्वतःचा राजकीय निर्णय घेण्याचे स्वातंत्र्य आहे. एकाच कुटुंबातील सदस्य वेगवेगळ्या पक्षांमध्ये काम करू शकतात, असे त्यांनी नमूद केले.

शिवसेनेतील संघर्षाला नवे वळण

सहा खासदारांच्या शिंदे गटातील प्रवेशानंतर ठाकरे आणि शिंदे गटातील संघर्ष आणखी तीव्र झाला आहे. संजय दिना पाटील यांच्या या वक्तव्यामुळे शिवसेनेतील अंतर्गत मतभेद आणि नाराजी पुन्हा एकदा चर्चेच्या केंद्रस्थानी आली आहे.