नाशिक विधान परिषद निवडणुकीत सस्पेन्स कायम! गोकुळ गीते माघार घेणार की लढणार? 11.30 वाजता निर्णयाची उत्सुकता
नाशिक स्थानिक स्वराज्य संस्था मतदारसंघातील विधान परिषद निवडणुकीत महायुतीसमोरील सर्वात मोठे आव्हान ठरलेले अपक्ष उमेदवार गोकुळ गीते यांच्याबाबतचा सस्पेन्स अद्याप कायम आहे. गीते माघार घेणार की निवडणूक लढवणार, याबाबत अंतिम निर्णय होण्याची शक्यता व्यक्त करण्यात आली असून सकाळी साडेअकरा वाजेपर्यंत चित्र स्पष्ट होऊ शकते, अशी माहिती समोर आली आहे.
महायुतीकडून शिवसेनेचे नरेंद्र दराडे हे अधिकृत उमेदवार आहेत. मात्र भाजपशी संबंधित गीते कुटुंबातील गोकुळ गीते यांनी अपक्ष उमेदवारी कायम ठेवल्याने महायुतीची चिंता वाढली आहे. ही बंडखोरी थांबवण्यासाठी मंत्री गिरीश महाजन आणि मंत्री उदय सामंत यांनी अनेक फेऱ्यांच्या चर्चा केल्या आहेत.
उदय सामंत यांनी माध्यमांशी बोलताना गोकुळ गीते आणि प्रसाद हिरे यांच्यासोबत सकारात्मक चर्चा झाल्याचे सांगितले. त्यांनी कोणतेही राजकीय आश्वासन देण्यात आले नसल्याचे स्पष्ट केले. गीते यांनी चर्चेसाठी आणखी वेळ मागितल्याचेही सामंत यांनी सांगितले.
दरम्यान, गोकुळ गीते यांनी माघार न घेण्यामागे स्वाभिमानाचा मुद्दा असल्याचे संकेत दिले आहेत. नरेंद्र दराडे यांचे पुत्र कुणाल दराडे यांनी कथितरीत्या अपमानास्पद वक्तव्य आणि धमकी दिल्यामुळे आपण निवडणुकीच्या मैदानात राहण्याचा निर्णय घेतल्याची चर्चा आहे. सन्मानाने विनंती केली असती तर विचार केला असता, अशी भूमिकाही गीते यांनी मांडल्याचे वृत्त आहे.
यापूर्वी उमेदवारी अर्ज मागे घेण्याच्या अंतिम मुदतीपर्यंतही गोकुळ गीते यांनी माघार घेण्यास नकार दिला होता. त्यामुळे नाशिकमध्ये नरेंद्र दराडे विरुद्ध गोकुळ गीते अशी थेट लढत अटळ मानली जात होती.
गोकुळ गीते यांनी सुरुवातीपासूनच निवडणूक बिनविरोध होऊ नये, ही आपली भूमिका असल्याचे सांगितले होते. नाशिकच्या राजकीय इतिहासात कमी संख्याबळ असलेले उमेदवारही विजयी झाले आहेत आणि आपल्याकडे स्वतःची रणनीती आहे, असा विश्वास त्यांनी व्यक्त केला होता.
महायुतीसाठी ही निवडणूक प्रतिष्ठेची बनली आहे. गोकुळ गीते यांनी अखेर माघार घेतली तर नरेंद्र दराडे यांचा मार्ग अधिक सोपा होईल. मात्र गीते निवडणूक लढवण्यावर ठाम राहिले तर नाशिकमधील राजकीय समीकरणे बदलू शकतात आणि महायुतीला अंतर्गत बंडखोरीचा फटका बसू शकतो.
आता सर्वांचे लक्ष गिरीश महाजन, उदय सामंत आणि गोकुळ गीते यांच्यातील अंतिम चर्चेकडे लागले आहे. साडेअकरा वाजता होणाऱ्या संभाव्य निर्णयानंतर नाशिक विधान परिषद निवडणुकीचे चित्र स्पष्ट होण्याची शक्यता आहे.
