NEET पेपरफुटी प्रकरणात मोठी कारवाई; प्राध्यापिका मनिषा मांढरे अटकेत

देशातील सर्वात मोठ्या वैद्यकीय प्रवेश परीक्षांपैकी एक असलेल्या NEET-UG 2026 परीक्षेच्या पेपरफुटी प्रकरणात तपास यंत्रणांना मोठे धागेदोरे मिळत आहेत. केंद्रीय अन्वेषण विभागाने (CBI) या प्रकरणात पुण्यातील वरिष्ठ प्राध्यापिका मनिषा गुरुनाथ मांढरे यांना अटक केली असून, पेपर लीक रॅकेटमध्ये त्यांची महत्त्वाची भूमिका असल्याचा संशय व्यक्त केला जात आहे.

एनटीएशी संबंधित प्राध्यापिकेवर कारवाई

तपासात समोर आलेल्या माहितीनुसार, मनिषा मांढरे या वनस्पतीशास्त्राच्या वरिष्ठ प्राध्यापिका असून त्या राष्ट्रीय परीक्षा संस्था (NTA) यांच्या परीक्षा प्रक्रियेशी संबंधित होत्या. बॉटनी आणि झूलॉजी विषयांच्या प्रश्नपत्रिकांशी त्यांचा थेट संबंध होता.

सीबीआयच्या तपासात असे समोर आले की, परीक्षा होण्यापूर्वी काही विद्यार्थ्यांना संभाव्य प्रश्न आणि अचूक उत्तरे सांगण्यात आली होती. विशेष म्हणजे, विद्यार्थ्यांना शिकवण्यात आलेले अनेक प्रश्न प्रत्यक्ष NEET परीक्षेत आल्याचा दावा तपास यंत्रणांनी केला आहे.

पुण्यात विशेष क्लासेसचा संशय

या प्रकरणात याआधी अटक करण्यात आलेल्या मनीषा वाघमारे यांच्या चौकशीतून मनिषा मांढरे यांचे नाव पुढे आले. तपास यंत्रणांच्या माहितीनुसार, पुण्यात काही निवडक विद्यार्थ्यांसाठी खास मार्गदर्शन वर्ग आयोजित करण्यात आले होते.

या वर्गांमध्ये विद्यार्थ्यांना प्रश्नपत्रिकेतील संभाव्य प्रश्न आणि त्यांच्या उत्तरांची माहिती देण्यात आली होती. अनेक विद्यार्थ्यांनी हे प्रश्न नोटबुकमध्ये लिहून घेतल्याचेही तपासात समोर आले आहे.

मुख्य सूत्रधारांपर्यंत तपास

सीबीआयने याआधी या प्रकरणातील कथित मुख्य सूत्रधार पी. व्ही. कुलकर्णी यांना अटक केली होती. कुलकर्णी हे रसायनशास्त्राचे प्राध्यापक असून ते अनेक वर्षे एनटीएच्या परीक्षा प्रक्रियेशी संबंधित होते.

तपास अधिक खोलात गेल्यानंतर प्राध्यापिका मनिषा मांढरे यांचा सहभाग उघड झाल्याचे सांगितले जात आहे. या संपूर्ण नेटवर्कमध्ये कोचिंग क्लासेस, एजंट आणि काही शैक्षणिक व्यक्तींचा सहभाग असल्याचा संशय तपास यंत्रणांनी व्यक्त केला आहे.

पालकांच्या तक्रारीनंतर उलगडा

या प्रकरणाचा उलगडा लातूर येथील काही पालकांच्या तक्रारीमुळे झाला. एका कोचिंग क्लासच्या मॉक टेस्टमध्ये विचारलेले अनेक प्रश्न प्रत्यक्ष NEET परीक्षेत आल्याचा आरोप पालकांनी केला होता.

यानंतर स्थानिक पोलिसांनी प्राथमिक चौकशी सुरू केली आणि नंतर तपास सीबीआयकडे वर्ग करण्यात आला. तपासादरम्यान अनेक राज्यांमध्ये छापेमारी करण्यात आली असून मोबाईल, लॅपटॉप, बँक व्यवहार आणि इतर कागदपत्रे जप्त करण्यात आली आहेत.

आतापर्यंत ९ जणांना अटक

या संपूर्ण प्रकरणात आतापर्यंत देशभरातून नऊ आरोपींना अटक करण्यात आली आहे. दिल्ली, पुणे, नाशिक, जयपूर, गुरुग्राम आणि अहिल्यानगर या ठिकाणांहून आरोपींना ताब्यात घेण्यात आले आहे.

सीबीआय आता आरोपींचे आर्थिक व्यवहार, फोन कॉल रेकॉर्ड आणि परस्पर संबंध तपासत आहे. या प्रकरणामुळे देशातील स्पर्धा परीक्षांच्या सुरक्षेवर गंभीर प्रश्नचिन्ह उपस्थित झाले आहे.