‘अजून एक गोड बातमी लवकरच कळेल’; पार्थ पवारांच्या लग्नावर सुप्रिया सुळेंचं सूचक वक्तव्य, लाडकी बहीण आणि कर्जमाफीवरही सरकारला घेरलं

पार्थ पवारांच्या लग्नाबाबत सुप्रिया सुळेंचं वक्तव्य

पार्थ पवार यांच्या साखरपुड्याची तारीख समोर आल्यानंतर त्यांच्या आत्या आणि खासदार सुप्रिया सुळे यांनी माध्यमांशी संवाद साधला. त्या म्हणाल्या, “आमच्याकडे सध्या लग्नांची मालिका सुरू आहे. पहिले युगेंद्र, त्यानंतर जय, मग रेवती आणि आता पार्थ. अजून एक गोड बातमी लवकरच तुम्हाला कळेल.” त्यांच्या या वक्तव्यामुळे पवार कुटुंबात आणखी एका शुभकार्याची चर्चा सुरू झाली आहे.

लाडकी बहीण योजनेवर सरकारला सवाल

सुप्रिया सुळे यांनी मुख्यमंत्री माझी लाडकी बहीण योजनेवरही सरकारला लक्ष्य केले. ई-केवायसी प्रक्रियेनंतर अनेक महिलांना योजनेतून वगळण्यात आल्याचा उल्लेख करत त्यांनी विचारले, “सर्व लाडक्या बहिणींना पैसे मिळाले का? एवढ्या मोठ्या प्रमाणावर महिलांना अपात्र का ठरवण्यात आलं?” तसेच जनधन योजना आणि आधारची माहिती उपलब्ध असताना लाभार्थ्यांचे केवायसी वेळेत का झाले नाही, असा सवालही त्यांनी उपस्थित केला.

शेतकरी कर्जमाफीवर टीका

राज्य सरकारने कर्जमाफीची घोषणा केली असली तरी तिची प्रभावी अंमलबजावणी झालेली नसल्याचा आरोप सुप्रिया सुळे यांनी केला. “कर्जमाफीची घोषणा झाली आहे, पण प्रत्यक्षात शेतकऱ्यांना त्याचा लाभ मिळालेला नाही,” असे म्हणत त्यांनी सरकारवर निशाणा साधला.

कांदा उत्पादकांच्या प्रश्नांवरही भूमिका

कांद्याच्या दराचा मुद्दा उपस्थित करत सुप्रिया सुळे म्हणाल्या की, शेतकऱ्यांना योग्य भाव मिळावा यासाठी त्या सातत्याने बैठका घेत आहेत. इगतपुरी परिसरातील भूसंपादनग्रस्त शेतकऱ्यांना न्याय मिळावा यासाठीही प्रयत्न सुरू असल्याचे त्यांनी सांगितले.

जयंत पाटील यांच्या कामाचं कौतुक

विधानसभेतील कामगिरीबाबत बोलताना सुप्रिया सुळे यांनी जयंत पाटील यांचे कौतुक केले. “जयंत पाटील हे आउटस्टँडिंग परफॉर्मर आहेत. त्यांच्या कामाची दखल मुख्यमंत्रीही घेत आहेत,” असे त्या म्हणाल्या. तसेच पक्षातील प्रत्येक खासदाराने सभागृहात सक्रियपणे भूमिका मांडली पाहिजे, असेही त्यांनी सांगितले.

विविध मुद्द्यांवर सरकारला घेरलं

यावेळी सुप्रिया सुळे यांनी राज्यातील कायदा-सुव्यवस्था, अर्थव्यवस्था आणि गुंतवणुकीच्या मुद्द्यांवरही सरकारवर टीका केली. महागाई, बेरोजगारी आणि शेतकऱ्यांच्या प्रश्नांवर सरकारने अधिक प्रभावीपणे काम करण्याची गरज असल्याचे त्यांनी म्हटले.