‘राम मंदिराची दानपेटी लुटणाऱ्यांसोबत जाणार का?’; शरद पवारांबाबतच्या चर्चांवर आदित्य ठाकरेंचा थेट सवाल

एनडीएच्या चर्चांवर आदित्य ठाकरेंची प्रतिक्रिया

गेल्या काही दिवसांपासून राष्ट्रवादी काँग्रेस (शरद पवार) पक्ष एनडीएमध्ये सहभागी होणार असल्याच्या चर्चा सुरू आहेत. याबाबत पत्रकारांनी विचारलेल्या प्रश्नाला उत्तर देताना आदित्य ठाकरे म्हणाले की, “तो आमचा प्रश्न नाही, तो त्यांचा प्रश्न आहे. आम्ही आमची भूमिका नेहमी स्पष्टपणे मांडत आलो आहोत.”

‘दानपेटी लुटणाऱ्यांसोबत जाणार का?’

आदित्य ठाकरे म्हणाले, “आज कोणताही पक्ष, आमदार, खासदार किंवा नगरसेवक अधिकृत किंवा अनधिकृतपणे भाजपसोबत जाण्याचा विचार करत असेल, तर त्यांनी स्वतःला एकच प्रश्न विचारावा – जी लोकं राम मंदिराची दानपेटीही लुटू शकतात, त्यांच्यासोबत तुम्ही मांडीला मांडी लावून बसणार का?” असा थेट सवाल त्यांनी उपस्थित केला. हे वक्तव्य अयोध्येतील राम मंदिर देणगी प्रकरणाच्या आरोपांच्या पार्श्वभूमीवर करण्यात आले.

भाजपवर पुन्हा निशाणा

आदित्य ठाकरे यांनी महागाई, वीज, पाणीटंचाई आणि जनतेच्या इतर प्रश्नांचाही उल्लेख केला. लोक विविध प्रश्नांवर नाराजी व्यक्त करत असल्याचे सांगत त्यांनी भाजपवर अप्रत्यक्ष टीका केली.

शरद पवार गटाबाबत चर्चांना उधाण

अलीकडच्या काळात राष्ट्रवादी काँग्रेस (शरद पवार) पक्षातील काही नेत्यांच्या भेटीगाठींमुळे एनडीएमध्ये जाण्याच्या चर्चांना वेग आला आहे. मात्र, या चर्चांबाबत पक्षाकडून कोणतीही अधिकृत घोषणा करण्यात आलेली नाही.

राम मंदिर देणगी प्रकरण पुन्हा चर्चेत

राम मंदिराच्या कथित देणगी गैरव्यवहाराच्या आरोपांवरून उद्धव ठाकरे यांनी यापूर्वी ‘राम रक्षा आंदोलन’ जाहीर केले होते. त्याच पार्श्वभूमीवर आदित्य ठाकरे यांनीही भाजपसोबत जाण्याचा विचार करणाऱ्या नेत्यांवर निशाणा साधला.

राजकीय वातावरण तापले

आदित्य ठाकरे यांच्या वक्तव्यानंतर महाराष्ट्रातील राजकीय वातावरण पुन्हा तापले आहे. राष्ट्रवादी काँग्रेसच्या भूमिकेबाबत सुरू असलेल्या चर्चांमध्ये या वक्तव्याची भर पडली असून, पुढील राजकीय घडामोडींवर सर्वांचे लक्ष लागले आहे.